थाइल्यान्डमा भीषण बाढी : १४५ जनाको मृत्यु, ३६ लाखभन्दा बढी प्रभावित

काठमाडौं । थाइल्यान्डमा आएको भीषण बाढीले जनधनको ठूलो क्षति पुर्‍याएको छ । दक्षिणी थाइल्यान्डमा बाढीले ठूलो विनाश निम्त्याएको छ, जहाँ मृत्यु हुनेहरूको संख्या कम्तीमा १४५ पुगेको छ ।

अधिकारीहरूले शुक्रबार यसको जानकारी दिँदै बाढीको पानी कम हुँदै जाँदा विनाशका डरलाग्दा दृश्यहरू बाहिर आइरहेका बताएका छन् ।

थाइल्यान्डको विपद् रोकथाम तथा व्यवस्थापन विभागले शुक्रबार भारी वर्षाका कारण १२ दक्षिणी प्रान्तहरूमा बाढी आएको बताएको छ । यो बाढीबाट १२ लाखभन्दा बढी परिवार र ३६ लाख मानिसहरू प्रभावित भएका छन् ।

बैंककमा आयोजित एक पत्रकार सम्मेलनमा सरकारी प्रवक्ता सिरिपोंगपों अंगकासाकुल्कियातले बाढीबाट आठ प्रान्तहरूमा १४५ जनाको मृत्यु भएको बताए । सोङखसों ला प्रान्त सबैभन्दा बढी प्रभावित भएको छ, जहाँ मात्रै ११० भन्दा बढी मृत्युको पुष्टि भएको छ । 

उनले बाढी कम हुँदै गएको, जसले गर्दा खोजी र उद्धार अभियानमा सहजता आइरहेको बताए ।

दक्षिणी थाइल्यान्डको सबैभन्दा ठूलो सहर हट याईमा सबैभन्दा धेरै शव फेला परेका छन् ।

विपद् विभागले शुक्रबार धेरैजसो प्रभावित क्षेत्रहरूमा पानी कम भए पनि केही इलाकाहरूमा जलस्तर अझै उच्च बताएको छ । मौसम विभागले दक्षिणमा वर्षा कम भए पनि केही ठाउँहरूमा मेघ गर्जनसहित वर्षाको चेतावनी रहेको बताएको छ ।

बाढीका कारण दक्षिणी थाइल्यान्डमा ठूलो अस्तव्यस्तता उत्पन्न भएको छ, जहाँ हजारौँ मानिसहरू फसेका, सडकहरूमा यातायात रोकिएका र तल्लो उचाइका भवनहरू र गाडीहरू पानीमा डुबेका छन् ।

शुक्रबार प्रभावित क्षेत्रहरूबाट आएका भिडियो र तस्बिरहरूमा भत्किएका सडकहरू, ढलेका बिजुलीका खम्बाहरू, घरायसी सामानहरू र भग्नावशेषहरू देखिएका छन् । जसलाई तीव्र बहावले बगाएर ल्याएको थियो र अब सडक किनारमा थुप्रो लागेको छ । कारहरू पल्टिएका वा एकअर्काको माथि चढेका देखिएका छन् । एपी