भेनेजुएलामा सैन्य कारबाही गर्ने विषयमा निर्णय गरिसकेको ट्रम्पको संकेत !

काठमाडौं । अमेरिकी राष्ट्रपति डोनाल्ड ट्रम्पले भेनेजुएलामा सैन्य कारबाही गर्ने विषयमा आफ्नो मन बनाइसकेको संकेत गरेका छन् । यो साता उच्चस्तरीय बैठक र क्यारेबियन क्षेत्रमा अमेरिकाले ठूलो संख्यामा सेना र युद्धपोत तैनाथ गरेपछि ट्रम्पले यस्तो संकेत गरेका हुन् । उनले एयर फोर्स वानमा पत्रकारलाई यसबारे बताएका थिए ।

उनका रक्षासचिव तथा संयुक्त चिफ्स अफ स्टाफजस्ता उच्चपदस्थ अधिकारीले बुधबार र बिहीबार उनलाई भेनेजुएलामा सैन्य कारबाहीका विभिन्न विकल्पबारे जानकारी गराएका थिए ।

यो साताको ‘ब्रिफिङ’मा ट्रम्पलाई भेनेजुएलाका राष्ट्रपति निकोलस मादुरोलाई हटाउन सम्भावित सैन्य विकल्प प्रस्तुत गरिएको चार स्रोतले सीएनएनलाई बताएका छन् ।

यसैबीच, अमेरिकाले क्यारेबियन क्षेत्रमा आफ्नो सैन्य शक्ति बढाएको छ । अमेरिकी नौसेनाले विश्वकै सबैभन्दा ठूलो विमानवाहक जहाज ‘यूएसएस जेराल्ड आर. फोर्ड’सहित १५ भन्दा बढी युद्धपोत र १५ हजार सैनिक त्यस क्षेत्रमा तैनाथ गरिसकेको छ ।

यो ‘अपरेसन सदर्न स्पियर’ नामक अभियानको एक भाग हो । अमेरिकाले पोर्टोरिकोमा १० एफ–३५ लडाकु जेट पनि तैनाथ गरेको छ ।

यी विकल्पमा सैन्य अड्डा वा सरकारी भवनमा हवाई हमला, लागुऔषध तस्करीमार्ग नष्ट गर्ने वा मादुरोलक्षित गर्नेजस्ता प्रस्ताव छन् । यद्यपि, उनले कुनै कारबाही नगर्ने निर्णय गर्न सक्छन् ।

भेनेजुएलाले यसको प्रतिक्रियामा आफ्ना सैनिक, हतियार र सैन्य सामग्रीको ‘ठूलोस्तरको स्थानान्तरण’ गर्ने घोषणा गरेको छ । मादुरोले चेतावनी दिएका छन् कि अमेरिकी सैन्य हस्तक्षेपले ‘अर्को गाजा’, ‘नयाँ अफगानिस्तान’ वा ‘फेरि भियतनाम’को स्थिति निम्त्याउन सक्छ ।

विश्लेषकको भनाइमा, यदि ट्रम्पले मादुरोलाई सत्ताबाट हटाउन सफल भए अमेरिकालाई रणनीतिक रूपमा फाइदा हुनसक्छ । तर, यसले अमेरिकालाई दीर्घकालीन सैन्य संलग्नतामा झस्कन बाध्य गराउन सक्छ । यसले ट्रम्पले आफ्नो राजनीतिक आधारबाट पनि समर्थन गुमाउन सक्ने जनाइएको छ । यो किनभने उनी विदेशमा युद्ध नथोपर्ने बाचाका साथ राष्ट्रपति निर्वाचित भएका थिए ।

शुक्रबार एयर फोर्स वनमा पत्रकारसँग ट्रम्पले भने, “मैले एक प्रकारले आफ्नो मन बनाइसकेको छु ।”

उनलाई मादुरोलाई हटाउने वा अवैध लागुऔषध र आप्रवासीको प्रवाह रोक्ने सम्भावित बाटोबारे सोधिएको थियो । छलफल गरिएका विकल्पमा सैन्य र सरकारी भवन, लागुऔषध तस्करीमार्गमा हवाई हमला गर्ने वा मादुरोलाई सिधै हटाउने प्रयास गर्ने योजना समावेश छन् ।

यदि, ट्रम्पले मादुरोलाई हटाउन सफल भए यसलाई धेरै अमेरिकी प्रशासनका निम्ति असाध्यै कठिन साबित भएको कार्यमा ठूलो सफलता मानिनेछ । यसबाट ट्रम्पले एक तानाशाहलाई हटाएर निर्वाचित नेतालाई स्थापित गर्ने, लागुऔषध र आप्रवासनको प्रवाहमा सुधार र सम्भावित तेल सम्झौताको श्रेय लिन सक्नेछन् ।

धेरै रिपब्लिकन नेता पनि अमेरिकी सेनालाई लामो समयसम्म ल्याटिन अमेरिकाको द्वन्द्वमा फसाउने जोखिमप्रति चिन्तित छन् ।