पुटिनसँगको वार्ता योजना स्थगित, ट्रम्पले भने– फलदायी नहुने बैठक गर्न चाहिनँ

काठमाडौं । रुस–युक्रेन युद्ध अन्त्यबारे आफ्ना रुसी समकक्षी भ्लादिमिर पुटिनसँग हुने भनिएको प्रत्यक्ष वार्ताको योजना रोकिएपछि अमेरिकी राष्ट्रपति डोनाल्ड ट्रम्पले आफू फलदायी नहुने बैठकमा सहभागी हुन नचाहेको बताएका छन् ।

ट्रम्पले मंगलबार ह्वाइट हाउसमा टिप्पणी गर्दै वर्तमान युद्ध रेखा (जसको नियन्त्रण जहाँसम्म छ) अनुसार लडाइँ रोक्न मस्कोले गरेको अस्वीकार मुख्य अवरोध बनेको संकेत गरेको  बीबीसीले जनाएको छ ।

यसअघि, ट्रम्पले बिहीबार दुई देशका प्रमुखहरूले दुई हप्ताभित्र बुडापेस्टमा वार्ता गर्ने बताए पनि ह्वाइट हाउसका एक अधिकारीले तत्काल भविष्यमा ट्रम्प–पुटिन बैठकको कुनै योजना नरहेको स्पष्ट पारेका थिए ।

यो हप्ता शान्तिका लागि अमेरिकी र रुसी प्रस्तावबीचका मुख्य भिन्नताहरू झन् स्पष्ट हुँदै गएका छन्, जसले शिखर सम्मेलनको सम्भावनालाई अन्त्य गरेको छ । 

ट्रम्प र पुटिन यसअघि अगस्टमा अलास्कामा भेटेका थिए । तर, हतारमा आयोजित उक्त शिखर सम्मेलनले कुनै ठोस नतिजा दिएन ।

ट्रम्प–पुटिनको दोस्रो बैठकको योजना स्थगित गर्ने ह्वाइट हाउसको पछिल्लो निर्णयलाई त्यस्तै प्रकारको अर्को अवस्थाबाट बच्ने प्रयासका रूपमा हेरिएको छ ।

एक वरिष्ठ युरोपेली कूटनीतिज्ञले रोयटर्ससँग भने, “मलाई लाग्छ, रुसीहरूले धेरै चाहेका थिए । ट्रम्पका लागि बुडापेस्टमा कुनै सम्झौता नहुने कुरा अमेरिकीहरूलाई स्पष्ट भयो ।”

तयारी बैठक आवश्यक नभएको अमेरिकी भनाइ
अमेरिकी विदेशमन्त्री मार्को रुबियो र रुसी विदेशमन्त्री सर्गेई लाभरोभबीच यस हप्ता एक तयारी बैठक हुने तय थियो । तर, ह्वाइट हाउसले दुई जनाबीच फलदायी फोन वार्ता भएको र अब बैठक आवश्यक नरहेको बताएको छ ।

सोमबार, ट्रम्पले किभ र युरोपेली नेताहरूले समर्थन गरेको वर्तमान फ्रन्टलाइनमा द्वन्द्व स्थिर गर्ने युद्धविराम प्रस्तावलाई स्वीकार गरेका थिए ।

उनले भने, “जहाँ छ, त्यहीँ रोकिनुहोस् । युद्ध रेखामा रोकिनुहोस् । घर जानुहोस् । लडाइँ रोक्नुहोस्, मानिसहरूको हत्या बन्द गर्नुहोस् ।”

रुसको अडानमा कुनै परिवर्तन छैन
रुसले बारम्बार वर्तमान सम्पर्क रेखालाई स्थिर गर्ने प्रस्तावको विरोध गर्दै आएको छ ।

क्रेमलिनका प्रवक्ता दिमित्री पेस्कोभले यो विचार रुसीहरूसमक्ष बारम्बार राखिएको भए पनि रुसको अडानमा कुनै परिवर्तन नभएको स्पष्ट पारे । उनले भने, “यो मस्कोको त्यही अडान हो, जसले समस्याग्रस्त पूर्वी क्षेत्रहरूबाट युक्रेनी सेनाको पूर्ण फिर्तीको माग गर्छ ।”

सर्गेई लाभरोभले मंगलबार मस्को लामो अवधिको, दिगो शान्तिमा मात्र रुचि राख्छ, जसको अर्थ फ्रन्टलाइन स्थिर गर्नु केवल अस्थायी युद्धविराम मात्र हुने बताए । बीबीसी