ट्रम्प भने– युक्रेनलाई टोमाहक मिसाइल पठाउन सक्छु

काठमाडौं । अमेरिकी राष्ट्रपति डोनाल्ड ट्रम्पले युक्रेनलाई लामो दुरीको टोमाहक क्रुज मिसाइल पठाउने विषयमा विचार गरिरहेको बताएका छन् ।

आइतबार एयर फोर्स वनमा पत्रकारहरूले किभलाई टोमाहक उपलब्ध गराउनेबारे प्रश्न गर्दा ट्रम्पले जवाफ दिँदै भने, “हामी हेर्नेछौँ, म पठाउन सक्छु ।” उनले ती मिसाइलहरू युक्रेन र रुसबीचको युद्धमा आक्रामकताको नयाँ चरण हुने बताएका छन् ।

ट्रम्पको यो भनाइ यसै हप्ताको अन्त्यमा युक्रेनी राष्ट्रपति भोलोदिमिर जेलेन्स्कीसँग भएको टेलिफोन वार्तापछि आएको हो, जहाँ जेलेन्स्कीले रुसविरुद्ध प्रतिआक्रमण गर्न बलियो सैन्य क्षमताको आवश्यकता रहेको बताउँदै दबाब दिएका थिए ।

यसअघि मस्कोले वासिङ्टनलाई किभलाई लामो दुरीका मिसाइलहरू उपलब्ध नगराउन चेतावनी दिएको थियो । रूसले त्यसो गरिएमा द्वन्द्वमा ठूलो वृद्धि हुने र अमेरिकी–रुसी सम्बन्धमा गम्भीर तनाव आउने बताएको थियो ।

टोमाहक मिसाइलहरूको दायरा करिब दुई हजार ५०० किलोमिटर रहेको छ, जसले गर्दा मस्को पनि युक्रेनको पहुँचभित्र पर्छ ।

ट्रम्पले युक्रेनले अनुरोध गरेका ती मिसाइलहरूबारे सम्भवतः रुससँग कुरा गर्ने बताएका छन् । “म उनीहरूलाई भन्न सक्छु कि यदि युद्ध समाधान भएन भने हामी यो पठाउन सक्छौँ । सायद नपठाउँला पनि, तर हामी गर्न सक्छौँ,” ट्रम्पले भने ।

अमेरिकी राष्ट्रपतिले थपे, “के रुस आफ्नो दिशामा टोमाहक आएको देख्न चाहन्छ ? मलाई त्यस्तो लाग्दैन ।”

आइतबार, क्रेमलिनका प्रवक्ता दिमित्री पेस्कोभले टोमाहकको विषय रुसका लागि अत्यन्तै चिन्ताको विषय भएको बताएका थिए । उनले भने, “अहिले साँच्चै पनि सबै पक्षबाट तनाव बढिरहेको सन्दर्भमा यो एकदमै नाटकीय क्षण हो ।”

सेप्टेम्बरमा पेस्कोभले टोमाहकको खतरालाई खासै महत्त्व नदिएका थिए र ती मिसाइलहरूले युद्धको गतिशीलता परिवर्तन गर्न नसक्ने बताएका थिए ।

तर, आइतबारको टिप्पणीमा उनले चेतावनी दिँदै भने, “यदि टोमाहकहरू रुसलाई लक्षित गरी प्रक्षेपण गरिए भने, ती मिसाइलहरूमा आणविक वारहेड छन् वा छैनन् भनेर हामी भन्न सक्दैनौँ ।”

उनले प्रश्न गरे, “रुसी महासंघले के सोच्नुपर्छ ? रुसले वास्तवमा कसरी प्रतिक्रिया दिनुपर्छ ?” सोमबार बिहान, पूर्वरुसी राष्ट्रपति दिमित्री मेदभेदेभले पेस्कोभको टिप्पणीलाई समर्थन गर्दै अझ कडा अडान व्यक्त गरे ।

मेदभेदेभले सामाजिक सञ्जालमा लेखे, “रुसले कसरी प्रतिक्रिया दिनुपर्छ ? ठीक भन्नुभयो ! यी मिसाइलहरूको डेलिभरी सबैका लागि नराम्रोसँग समाप्त हुन सक्छ र सबैभन्दा पहिले, ट्रम्पका लागि स्वयं ।”

पछिल्ला केही वर्षमा बढ्दो उग्रवादी छवि बनाएका मेदभेदेभ प्रायः क्रेमलिनको आधिकारिक अडानभन्दा बढी चरम अभिव्यक्ति सामाजिक सञ्जालमा दिन्छन् । उनी र ट्रम्पबीच यसअघि पनि अनलाइन वाकयुद्ध भइसकेको छ ।

अगस्टमा मेदभेदेभको टिप्पणीपछि ट्रम्पले दुई आणविक पनडुब्बीहरूलाई रुसनजिक सार्न आदेश दिएको बताइएको थियो ।

सन् २०२२ मा रुसले पूर्ण–स्तरीय आक्रमण सुरु गरेपछि युक्रेनले लामो दुरीका मिसाइलहरूको लागि बारम्बार अनुरोध गर्दै आएको छ, किनभने उसले संघर्षको अग्रपंक्तिबाट टाढा रहेका रुसी सहरहरूमा प्रहार गर्ने सम्भावनाबारे विचार गरिरहेको छ ।

जेलेन्स्की र ट्रम्पले हालैको टेलिफोन वार्तामा युक्रेनको सैन्य क्षमतालाई सुदृढ पार्ने प्रयासबारे छलफल गरेका थिए, जसमा हवाई रक्षा प्रणाली र लामो दुरीका हतियारहरू सुदृढ पार्ने विषय समावेश थियो । बीबीसी