ताइवानको स्वतन्त्रता कहिल्यै स्वीकार्य हुनेछैन : सी चिनफिङ
काठमाडौं । चिनियाँ राष्ट्रपति सी चिनफिङले राष्ट्रिय दिवसको पूर्वसन्ध्यामा ताइवानको स्वतन्त्रतालाई लिएर हुने पृथकतावादी गतिविधि र बाह्य हस्तक्षेपको कडा विरोध गर्ने बताएका छन् । साथै, राष्ट्रिय सार्वभौमसत्ता तथा क्षेत्रीय अखण्डताको दृढतापूर्वक रक्षा गर्ने बताएका छन् ।
जनवादी गणतन्त्र चीनको स्थापनाको ७६औँ वार्षिकोत्सव मनाउन बेइजिङको ग्रेट हल अफ द पिपलमा मंगलबार आयोजित एक स्वागत समारोहमा चिनफिङले उक्त टिप्पणी गरेका हुन् ।
चिनफिङ चीनको कम्युनिस्ट पार्टी (सीपीसी) को केन्द्रीय समितिका महासचिव र केन्द्रीय सैन्य आयोगका अध्यक्ष पनि हुन् ।
सीले भने, “ताइवान स्ट्रेटमा आदानप्रदान र सहयोगलाई गहिरो बनाउने, ताइवानको स्वतन्त्रताको पृथकतावादी गतिविधि र बाह्य हस्तक्षेपको कडा विरोध गर्ने, राष्ट्रिय सार्वभौमसत्ता तथा क्षेत्रीय अखण्डताको दृढतापूर्वक रक्षा गर्ने बलियो प्रयास गरिनुपर्छ ।”
यसअघि, सी, सत्तारुढ चिनियाँ कम्युनिस्ट पार्टी र राज्यका अन्य नेताहरूसँगै, मध्य बेइजिङको तियानमेन स्क्वायरमा एक समारोहमा सहभागी भएका थिए ।
यो कार्यक्रम राष्ट्रिय दिवसभन्दा एक दिनअघि, सहिद दिवसको उपलक्ष्यमा आयोजना गरिएको थियो ।
बुधबारदेखि, चीनले आधिकारिक रूपमा राष्ट्रिय दिवस मनाउन एक हप्ताको सार्वजनिक बिदा मनाउनेछ ।
यस वर्ष दोस्रो विश्वयुद्धको क्रममा जापानी आक्रमणविरुद्धको चिनियाँ जनप्रतिरोध युद्धमा विजयको ८०औँ वार्षिकोत्सव पनि हो ।
आफ्नो सम्बोधनमा, सीले राष्ट्रका मानिसहरूलाई कडा मेहनत जारी राख्न र आधुनिकीकरणलाई अगाडि बढाउनका लागि दृढ संकल्पका साथ अगाडि बढ्न आह्वान गरे ।
सीले भने, “चिनियाँ राष्ट्रको महान् कायाकल्प एक अभूतपूर्व कार्य हो । आकांक्षाहरू र चुनौतीहरू दुवैले हामीलाई हरपलको फाइदा उठाउन र अटुट उत्साहका साथ अगाडि बढ्न प्रेरित गर्दछन् ।”
उनले नयाँ चीनको स्थापना भएदेखि ७६ वर्षमा, सीपीसीले आत्मनिर्भरता र निरन्तर प्रयासको भावनामार्फत मानिसहरूलाई सानदार उपलब्धिहरू हासिल गर्न प्रेरित गरेको बताए ।
