ताइवानको हवाई क्षेत्रमा चीनका ३३ विमान, आठ नौसेना जहाज र तीन सरकारी जहाजको घुसपैठ

काठमाडौं । ताइवानको आसपासको समुद्री र हवाई क्षेत्रमा चिनियाँ सेनाको घुसपैठ भएको ताइवानको रक्षा मन्त्रालय (एमओडी)ले जनाएको छ ।

एएनआई समाचार संस्थाका अनुसार, मंगलबार बिहान ६ बजेसम्ममा ३३ चिनियाँ 'पिपुल्स लिबरेसन आर्मी' (पीएलए) विमान, आठ चिनियाँ नौसेना (पीएलएएन) जहाज र तीन सरकारी जहाज सक्रिय रहेको पाइएका छन् ।

यी गतिविधिहरू ताइवान जल मार्ग र त्यसको आसपासको हवाई रक्षा पहिचान क्षेत्र (एडीआईजेड) मा भएको पाइएका थिए । यी ३३ विमानहरूमध्ये २३ वटाले मध्य रेखा पार गरेर ताइवानको उत्तरी, मध्य तथा दक्षिण–पश्चिमी एडीआईजेडमा प्रवेश गरेका बताइएको छ ।

एमओडीले सामाजिक सञ्जाल 'एक्स'मा एक पोस्टमार्फत यसको पुष्टि गर्दै बिहान ६ बजेसम्म ताइवानको आसपासमा ३३ पीएलए विमान, ८ पीएलएएन जहाज तथा ३ सरकारी जहाजको उपस्थिति पत्ता लागेको बताएको छ । यीमध्ये २३ उडानहरूले मध्य रेखा पार गरेर उत्तरी, मध्य र दक्षिण–पश्चिमी एडीआईजेडमा प्रवेश गरेका थिए ।

"हामीले यो सम्पूर्ण घटनामाथि दृष्टि राखिरहेका छौँ र उचित कदम चालेका छौँ," एमओडीले भनेको छ ।

एक दिनअघि, सोमबार एमओडीले आठ चिनियाँ सैन्य विमान, आठ नौसैनिक जहाज र चार सरकारी जहाजको गतिविधिलाई पत्ता लगाएको थियो । ती आठ उडानहरूमध्ये ६ वटाले मध्य रेखा पार गरेर ताइवानको उत्तरी, मध्य, दक्षिण–पश्चिमी तथा पूर्वी एडीआईजेडमा घुसपैठ गरेका थिए ।

सेप्टेम्बर १८ मा चीनका रक्षामन्त्री डोङ जुनले आफ्नो देशले स्वशासित ताइवानमाथि कब्जा गर्ने बताएका थिए । बेइजिङको 'शियांगशान फोरम'मा अन्तर्राष्ट्रिय सैन्य अधिकारीहरूलाई सम्बोधन गर्दै डोङले ताइवानलाई चीनमा पुनर्स्थापन गर्नु दोस्रो विश्व युद्धपछिको अन्तर्राष्ट्रिय व्यवस्थाको अभिन्न अंग भएकोमा जोड दिएका थिए ।

ताइवान २.३ करोड जनसंख्या भएको एक क्षेत्र हो, जुन सन् १९४९ देखि चीनबाट अलग छ । बेइजिङले ताइवानलाई आफ्नो एक अलग प्रान्त मान्दछ र उसले ताइवानलाई नियन्त्रणमा लिन सैन्य बलको प्रयोग गर्न अस्वीकार गरेको छैन । चीनले लगभग हरेक दिन टापु नजिक युद्धपोत एवं विमान पठाएर ताइवानमाथि सैन्य दबाब कायम राखिरहेको छ ।

अर्कोतर्फ, ताइवानका राष्ट्रपति लाई चिङ–ते र उनको सत्ताधारी 'डेमोक्रेटिक प्रोग्रेसिभ पार्टी'ले बेइजिङको दाबीलाई पूर्णरूपमा अस्वीकार गर्दै आएका छन् । उनीहरू ताइवान एक सार्वभौम राष्ट्र हो र यसको भविष्य यसका जनताले नै तय गर्ने बताउँछन् ।

डोङले चीनले ताइवानको स्वतन्त्रताका लागि गरिने कुनै पनि पृथकतावादी प्रयासलाई सफल हुन नदिने चेतावनी दिएका थिए र उनीहरू कुनै पनि बाहिरी सैन्य हस्तक्षेपलाई विफल पार्न तयार भएको बताएका थिए । उनले यो पनि भनेका थिए कि चिनियाँ सेना सबै पक्षको सहयोगमा विश्वव्यापी शान्ति, स्थिरता एवं प्रगतिको प्रवर्धन गर्ने शक्तिको रूपमा कार्य गर्न तत्पर रहेको छ ।

द ट्रिब्युनबाट ।