यमनको राजधानीमा भीषण इजरायली आक्रमण : दुईको मृत्यु, ४८ जना घाइते

काठमाडौं । इजरायली सेनाले यमनको राजधानी सानामा भीषण हवाई आक्रमण गरेको छ । अल मसिरह टेलिभिजनका अनुसार, हमलापछि सहरभरि धुवाँको मुस्लो देखिएको थियो ।

इजरायली सेनाका प्रवक्ताले बिहीबारको आक्रमण पुष्टि गरेका छन् । उनले दर्जनौँ लडाकु विमान प्रयोग गरी हुथीहरूको भनिएको जनरल स्टाफको कमान्ड मुख्यालय र समूहको सुरक्षा तथा गुप्तचर संयन्त्रका कम्पाउन्डलाई निसाना बनाएको बताए ।

इजरायलका रक्षामन्त्री इजरायल काट्जले सामाजिक सञ्जाल एक्समा विज्ञप्ति जारी गर्दै यी शक्तिशाली हमलामा दर्जनौँ हुथी आतंकवादी कार्यकर्ता मारिएको दाबी गरे । तर, हुथीसम्बद्ध मिडियाले आक्रमणमा दुईजना मारिनुका साथै ४८ जना घाइते भएको जनाएको छ ।

हुथी नेता अब्देल–मलिक अल–हुथी टेलिभिजनमार्फत भाषण दिइरहेका बेला आक्रमण भएको थियो । इजरायली सेनाले सानास्थित लक्ष्यमध्ये सैन्य प्रचार विभागको मुख्यालय र हतियार भण्डारण भएका सैन्य क्याम्प रहेको बताएको छ । इजरायलले यी हमलाहरू हुथीहरूले सञ्चालन गरेको ड्रोन र मिसाइल आक्रमणको जवाफमा गरिएको स्पष्ट पारेको छ ।

बुधबार हुथीहरूले इजरायलको लाल सागर किनारमा रहेको इलात बन्दरगाह सहरमा ड्रोन आक्रमण गरेको दाबी गरेका थिए । यो आक्रमण, यमनको प्रमुख बन्दरगाह होडेइडाहमा इजरायलले सञ्चालन गरेको १२ वटा शृंखलाबद्ध हमलापछि भएको हो ।

बिहीबार आफ्नो भाषणमा अल–हुथीले गाजामा करिब दुई वर्षदेखि जारी युद्धका बीच इजरायलमाथि प्यालेस्टिनीहरूमाथि क्रूर आक्रमण र नरसंहार गरेको आरोप लगाए । 

उनले भने, “यस हप्ता अमेरिकाले सुरक्षा परिषदमा युद्धविराम र इजरायली प्रतिबन्ध हटाउन माग गर्ने प्रस्तावलाई रोक्न आफ्नो भिटो प्रयोग गर्‍यो ।”

उनले अमेरिकी अडानले इजरायललाई आफ्ना अपराधहरू जारी राख्न थप प्रोत्साहित गरेको बताए । अल–हुथीले सीमित स्रोतसाधन हुँदाहुँदै पनि इजरायली सेनाविरुद्ध वीरतापूर्ण कारबाही गरेको भन्दै प्यालेस्टिनी गुटहरूको प्रशंसा गरेको छ ।

रोयटर्सले सानाका बासिन्दालाई उद्धृत गर्दै इजरायलको पछिल्लो आक्रमण राजधानीको दक्षिण र पश्चिम क्षेत्रहरूमा लक्षित भएको जनाएको छ ।

अल्जजिराबाट ।