अमेरिकामा इनर्जी ड्रिंक क्यानमा भोड्का भरेर बजार पठाएपछि...

काठमाडौं । अमेरिकी खाद्य तथा औषधि प्रशासन (यूएसएफडीए)ले सेल्सियस इनर्जी ड्रिंकको अस्ट्रो भाइब ब्लु राज संस्करणका केही क्यानहरूमा भुलबस भोड्का भरिएको भन्दै चेतावनी जारी गरेको छ ।

यो गडबडी तब भयो जब एक प्याकेजिङ आपूर्तिकर्ताले भुलबस खाली सेल्सियस क्यानहरूलाई भोड्का सेल्टजर कम्पनी हाई नुनमा पठायो । उसले ती क्यानहरूमा रक्सी भरेको पाइएको बीबीसीले जनाएको छ ।

हाई नुनले पनि उही उत्पादन लाइनबाट आएका आफ्ना केही बिच भेराइटी प्याकहरू बजारबाट फिर्ता मागिरहेको छ । यूएसएफडीएले प्रभावित उत्पादनहरूबाट कुनै बिरामी वा प्रतिकूल घटनाहरू रिपोर्ट नभएको बताएको छ ।
 
बजारमा पठाइएको उत्पादन फिर्ता गर्नुपर्दा दुई उत्पादन लटहरूलाई असर गरेको यूएसएफडीएले आफ्नो वेबसाइटमा प्रकाशित गरेको छ । 

यी उत्पादनहरू २१ जुलाई र २३ जुलाईको बीचमा अमेरिकाको फ्लोरिडा, न्युयोर्क, ओहायो, साउथ क्यारोलाइना, भर्जिनिया र विस्कन्सिनका खुद्रा बिक्रेताहरूमा पठाइएको बीबीसीले जनाएको छ ।

“उपभोक्ताहरूलाई प्रभावित लट कोडहरू भएका सेल्सियस अस्ट्रो भाइब इनर्जी ड्रिंक, स्पाकलिङ ब्लु राज संस्करणका क्यानहरू फाल्न र त्यसमा भएको तरल पदार्थ नपिउन सल्लाह दिइएको छ,” यूएसएफडीएले भनेको छ । बीबीसी