जेल भरिएपछि इटालीले १० हजार कैदी रिहा गर्ने

काठमाडौं । इटालीले जेलको भीडभाड कम गर्न करिब १० हजार अर्थात् कुल कैदी संख्याको लगभग १५ प्रतिशतलाई रिहा गर्न सक्ने न्याय मन्त्रालयले घोषणा गरेको छ ।

मन्त्रालयले मंगलबार जारी गरेको विज्ञप्तिमा १० हजार १०५ कैदीहरू सम्भावित रूपमा  रिहा गर्न योग्य भएको र उनीहरूलाई जेलको सट्टा घरमा नजरबन्द वा अन्य वैकल्पिक उपायहरू लागु गर्न सकिने बताएको छ ।

यो विकल्प त्यस्ता व्यक्तिहरूका लागि लागु हुनेछ, जसको सजाय अन्तिम भइसकेको र पुनरावेदनको मुद्दा छैन । साथै, दुई वर्षभन्दा कम सजाय बाँकी भएका र विगत १२ महिनामा कुनै गम्भीर अनुशासन उल्लंघन नगरेका पनि हुनुपर्ने बताइएको छ । 

आतंकवाद, संगठित अपराध, बलात्कार, आप्रवासी तस्करी र अपहरण जस्ता गम्भीर अपराधका लागि सजाय भोगिरहेका व्यक्तिहरूलाई भने यो सुविधाबाट वञ्चित गरिने मन्त्रालयले थपेको छ ।

वर्ल्ड प्रिजन ब्रीफ डाटाबेसका अनुसार, इटाली युरोपमा सबैभन्दा खराब जेल भीडभाडको रेकर्ड भएका देशहरूमध्ये एक हो, जहाँ जेलको अधिभोगस्तर करिब १२२ प्रतिशत छ ।

१०० प्रतिशतभन्दा माथिको कुनै पनि स्तरले जेलहरू अधिकतम क्षमताभन्दा बढी भरिएको संकेत गर्छ । डाटाबेसका अनुसार, युरोपमा साइप्रस, फ्रान्स र टर्कीमा मात्र योभन्दा उच्च स्कोर छ ।