बचत रकम फिर्ताको माग गर्दै सहकारीपीडित धर्नामा
काठमाडौं । बचत रकम फिर्ताको माग गर्दै सहकारीपीडित सोमबार (मंसिर ८) पनि धर्नामा बसेका छन् । पीडितले काठमाडौंको बुद्धनगरस्थित सहकारी विभागको कार्यालयअगाडि धर्ना दिएका हुन् ।
सरकारले सहकारीपीडित बचतकर्ताको रकम फिर्ता गर्ने कार्यलाई निरन्तरता नदिएकाले धर्नामा बस्नुपरेको उनीहरूले बताएका छन् । बचत रकम फिर्ताको माग गर्दै गएको शुक्रबार (मंसिर ५)देखि सहकारीपीडित धर्नामा बस्दै आएका छन् ।
उनीहरूले सहकारी ‘बचतकर्ताको मागलाई राजपत्रमा प्रकाशित गर’, ‘पीडितलाई पीडा दिएर पीडकलाई साथ दिने राजनीतिक मतियार राजीनामा दे’ लगायत नारा लेखिएका प्लेकार्ड प्रदर्शन गरेका छन् ।
रहरले नभई दुःख गरी कमाएर भविष्यका निम्ति भनेर राखेको बचत फिर्ताका लागि आन्दोलनमा उत्रिएको उनीहरूको भनाइ छ । आन्दोलनरत एक सहकारीपीडितले राज्यले आफूहरूको पीडा नसुनेको भन्दै दुखेसो पोखे ।
आफूहरूको बचत फिर्ता नगरिएसम्म आन्दोलन जारी राख्ने उनले चेतावनी दिए । न्युज एजेन्सी नेपाल
