पोखरा बचत सहकारीका बचतकर्तालाई प्रमाणसहित उजुरी दर्ता गर्न प्रहरीको आग्रह

काठमाडौं । जिल्ला प्रहरी कार्यालय कास्कीले पोखरा महानगरपालिका–९, नयाँबजारमा सञ्चालित पोखरा बचत तथा ऋण सहकारी संस्था लिमिटेडका बचतकर्तालाई प्रहरीमा उजुरी दर्ता गर्न आग्रह गरेको छ ।

प्रहरीले बिहीबार सूचना जारी गरी सो सहकारीका सञ्चालक समिति, व्यवस्थापक, विभिन्न कालखण्डमा रहेका पदाधिकारीहरू र जिम्मेवार व्यक्तिहरूले निक्षेपकर्ताको बचत रकम फिर्ता नगरी ठगी गरेको आरोपमा अनुसन्धान सुरु गरिएकाले बचतकर्तालाई आगामी मंसिर २ गतेभित्रमा जाहेरी दिन आग्रह गरेको हो । प्रहरीले पीडित बचतकर्तालाई आधिकारिक उजुरी दर्ता गर्न अपिल गरेको हो ।

“सहकारी रजिस्ट्रारको कार्यालय पोखराको पत्र तथा कागजात यस कार्यालयमा प्राप्त भई मुद्दा दर्ता भएपश्चात् केही जिम्मेवार पदाधिकारी तथा कर्मचारी नियन्त्रणमा लिइ अनुसन्धानका क्रममा रहेकाले उक्त सहकारी संस्थामा बचतकर्ता रही सहकारीबाट बचत तथा सेयर रकम फिर्ता नपाउनु भएका पीडित व्यक्तिहरुले सहकारीमा रकम जम्मा गरेको आधार देखिने शेयरधनी प्रमाणपत्र सहित यस कार्यालयमा सम्पर्क राख्नुहुन सम्पूर्ण बचतकर्तामा सुचित गरिएको छ,” प्रहरीले जारी गरेको सूचनामा उल्लेख छ ।

पोखरा बचत तथा ऋण सहकारी संस्था लिमिटेडबाट ८८ करोड ७० लाख हिनामिना गरिएको पुष्टि भएको छ । सहकारी रजिष्ट्रारको कार्यालयले गरेको अनुसन्धानमा सो रकम हिनामिना भएको पुष्टि भएपछि कार्यालयले प्रहरीलाई विस्तृत अनुसन्धानका लागि यही कात्तिक १८ गते पत्राचार गरेको थियो । 

सोही आधारमा कास्की प्रहरीले सहकारी घोटालामा संलग्न भएको आरोपमा सहकारीका अध्यक्ष सुरेन्द्रबहादुर गोदारसहित सातजनालाई बुधबार पक्राउ गरेर थप अनुसन्धान प्रक्रिया अघि बढाएको छ ।