गृह मन्त्रालयको निर्णयले व्यवसायीको मनोबल बढायो : महासंघ
काठमाडौं । नेपाल उद्योग वाणिज्य महासंघले हालै सरकारको निर्णयले व्यवसायीमा मनोबल बढाएको बताएको छ । एक विज्ञप्ति जारी गर्दै महासंघले सरकारले अनुकूल व्यावसायिक वातावरण तयार गर्न जिल्लास्थित उद्योग वाणिज्य संघलगायत व्यवसायीहरूको सहभागितामा बैठक राखी आवश्यक समन्वय गर्न सबै जिल्ला प्रशासन कार्यालयलाई बिहीबार परिपत्र गरेकोप्रति आभार प्रकट गरेको छ ।
“महासंघले निजी क्षेत्रको सुरक्षाको प्रत्याभूतिका लागि केन्द्र र जिल्लास्तरीय सुरक्षा समितिहरूमा महासंघको प्रतिनिधित्व सुनिश्चित गर्न सम्बन्धित जिल्ला नगर उद्योग वाणिज्य संघका अध्यक्ष एवं प्रतिनिधिको सहभागिताका कात्तिक २ गते गृह मन्त्रालयमा पत्राचार गरेको थियो,” विज्ञप्तिमा उल्लेख छ ।
महासंघले सबै तहमा सरकार निजी क्षेत्र समन्वय र मुख्य गरी जिल्लास्तरीय सुरक्षा योजना, जोखिम मूल्यांकन र आकस्मिक निर्णय प्रक्रियामा पनि व्यावसायिक समुदाय प्रत्यक्ष सहभागिता सुनिश्चितताको लागि आग्रह गरेको थियो । केन्द्र, प्रदेश, जिल्ला र स्थानीय तहमा सरकार र निजी क्षेत्रबीच समन्वय संयन्त्रको आवश्यकता महशुस गरिएको अवस्थामा सरकारको यो निर्णयले व्यावसायिक मनोबल बढाउन सरकार र निजी क्षेत्रवीच समन्वय एवं सहकार्यमा सहजता थप्ने महासंघले जनाएको छ ।
“यस निर्णयबाट व्यवसायीको मनोबल बढ्न गई अर्थतन्त्र चलायमान हुने विश्वास हामीले लिएका छाँै,” महासंघका कार्यवाहक अध्यक्ष अन्जन श्रेष्ठले भने, “यसका लागि हामी नेपाल सरकार गृह मन्त्रालयलाई धन्यवाद दिन चाहन्छौँ ।”
यसैबीच महासंघले सरकारको निर्णयअनुसार जिल्लास्थित उद्योग वाणिज्य संघहरूलाई सम्बन्धित जिल्ला प्रशासन कार्यालयमा सम्पर्क गरी आवश्यक समन्वय गर्न पनि आग्रह गरेको छ ।
