जंगली जनावरको आक्रमणबाट एकजनाको मृत्यु

राँझा । राप्तीसोनारी गाउँपालिका–९ गुरुवागाउँ नमुना टोल निवासी इन्द्रबहादुर खत्रीको जंगली जनावरको आक्रमणबाट मृत्यु भएको छ । 

गुरुवागाउँ नमुना टोल निवासी ४० वर्षीय खत्री शुक्रबार दिउँसो २ बजेतिर स्थानीय रिम्ना सामुदायिक वनमा घाँस काट्न गएपछि बेपत्ता भएका थिए । 

आज बिहानसम्म परिवारको सम्पर्कमा नआएपछि जंगलमा खोज्दै जाँदा उनको शव फेला परेको प्रहरी चौकी ढकेरीका इञ्चार्ज प्रहरी सहायक निरीक्षक नगेन्द्र शाहीले जानकारी दिए । 

उनका अनुसार आज बिहानै प्रहरीसहित स्थानीयवासीको टोलीले जंगलमा खत्रीलाई खोज्ने क्रममा रिम्ना सामुदायिक वनको चिल्लेपाटामा जंगली जनावरले आक्रमण गरेको अवस्थामा शव फेला परेको हो । 

बाँके राष्ट्रिय निकुञ्जको क्षेत्र पर्ने भएकाले निकुञ्जसँग समन्वय गरेर शवको शव परीक्षणलगायतको प्रक्रिया सुरु गरिएको उनको भनाइ छ । 

घटनाको प्रकृति हेर्दा बाघले आक्रमण गरेको हुनसक्ने बाँके राष्ट्रिय निकुञ्जका प्रमुख वरिष्ठ संरक्षण अधिकृत वीरेन्द्रप्रसाद कँडेलले बताए । 

“बाघ वा चितुवाले आक्रमण गरेको हुनुपर्छ, घटनास्थलको प्रकृति हेर्दा बाघको आक्रमण जस्तो छ”, उनले भने, “हामीले घटनास्थल क्षेत्रमा क्यामेरा जडान गर्छौं, क्यामेरामा कैद भएका आधारमा पुष्टि हुनेछ ।” रासस