नवलपरासीमा अटो दुर्घटना हुँदा एक जनाको मृत्यु, ११ घाइते

मध्यविन्दु । नवलपरासीको देवचुली नगरपालिका–६ मा सामान बोक्ने अटो दुर्घटना हुँदा एक जनाको मृत्यु भएको छ । अन्य ११ जना घाइते भएका छन् ।

वडा नम्बर ६ को टोक्रेखोला पुलनजिकै कीर्तिपुरबाट दलदलेतर्फ आउँदै गरेको लु १ स ९०९४ नम्बरको अटो दुर्घटना हुँदा भारतको मोतिहारी घर भएका ३५ वर्षीय रिजुवान खातुनको मृत्यु भएको हो ।

जिल्ला प्रहरी कार्यालयका प्रहरी उपरीक्षक यादव ढकालका अनुसार, सडकदेखि केही तल खसेको अटोमा चालकसहित १२ जना सवार थिए । घाइते सबैलाई उपचारका लागि चितवन लगिएकामा रिजुवानको उपचारका क्रममा मृत्यु भएको हो ।

दुर्घटनाका सबै घाइते भारतीय नागरिक रहेको प्रहरी उपरीक्षक ढकालले जानकारी दिए ।

घाइते हुनेहरूमा ३५ वर्षीया सवना खातुन, १८ वर्षीया रजिया खातुन, ४२ वर्षीय मोहम्मद रजा, १५ वर्षीया मेहेक इस्तियाक, ४० वर्षीया इस्तियाक आलम, १८ वर्षीया मौजमा इमाम, १२ वर्षीया जोया इस्तियाक, ११ वर्षीय निजामुदिन हुसेन, १४ वर्षीया सावा खातुन, १२ वर्षीय उमर रजा र १६ वर्षीया कुलसुम वान छन् । रासस