बाजुरामा ट्याक्टर दुर्घटना, एकजनाको मृत्यु

बाजुरा । बाजुराको पूर्वी उत्तरी भेगको स्वामीकार्तिक खापर गाउँपालिकामा बुधबार साँझ ट्याक्टर दुर्घटना हुँदा एकजनाको घटनास्थलमा मृत्यु भएको छ । 

मृत्यु हुनेमा सोही गाउँपालिका–१, बर्कुका २७ वर्षीय पदमबहादुर बुढा रहेको जिल्ला प्रहरी कार्यालय बाजुराका प्रहरी निरीक्षक तथा सूचना अधिकारी देवबहादुर चौधरीले जानकारी दिए ।

उनका अनुसार, सोही गाउँपालिकाको जोरु लेकबाट पिलुचौरका लागि स्याउ लिएर आउने क्रममा पिलुचौर साप्पाटा सडकको बर्कुबाट ट्याक्टर अनियन्त्रित भई दुर्घटना भएको हो । 

सोही गाउँपालिका–४ बस्ने २४ वर्षीय रवीन्द्र नाथले चलाएको भे ००१ त ०४८१ नम्बरको ट्याक्टर दुर्घटना भएको हो । दुर्घटनामा परी बुढाको मृत्यु भएको छ भने ३५ वर्षीय लोकेन्द्र रोकाया घाइते भएका छन् । घाइते रोकायाको बर्कु स्वास्थ्य चौकीमा उपचार भइरहेको छ । 

दुर्घटनामा परी घाइते भएका रोकायाको टाउको र ढाडमा चोट लागेको छ । चालक र सहचालक भने फरार रहेको जिल्ला प्रहरी कार्यालय बाजुराले जनाएको छ । ट्याक्टर सडकबाट करिब ३५० मिटर तल खसेको छ । 

दुर्घटनाको खबरपछि इलाका प्रहरी कार्यालय स्वामीकार्तिकको टोली घटनास्थलमा पुगेको छ । घटनाको थप अनुसन्धान भइरहेको प्रहरीको भनाइ छ । रासस